У выдавецтве Беларускага дзяржаўнага ўніверсітэта выйшаў вучэбна-метадычны дапаможнік “Беларуская мова. Тэрміналогія фізікі і матэматыкі” (CD), рэкамендаваны Вучэбна-метадычным аб’яднаннем па гуманітарнай адукацыі для студэнтаў нефілалагічных спецыяльнасцей ВНУ Беларусі. Дапаможнік з’яўляецца сумесным праектам выкладчыкаў кафедры гісторыі беларускай мовы БДУ і кафедры беларускага мовазнаўства БДПУ. Яго аўтарамі з’яўляюцца Д.В.Дзятко (БДПУ), М.К.Чаеўская (БДУ), А.М.Муравіцкая (БДУ).

У вучэбна-метадычным дапаможніку змешчаны тэарэтычныя звесткі па ўсіх раздзелах курса “Беларуская мова: прафесійная лексіка”, а таксама заданні і практыкаванні з выкарыстаннем фізічнай і матэматычнай тэрміналогіі, праца над якімі дазволіць трывала засвоіць і замацаваць матэрыял.

Пераклад прапанаваных тэкстаў спецыяльнага характару будзе спрыяць назапашванню адпаведнай лексікі і павышэнню культуры маўлення.

Выданне ўтрымлівае “Руска-беларускі слоўнік фізічных тэрмінаў” і “Руска-беларускі слоўнік матэматычных тэрмінаў”.