19 красавіка ў межах дэкады студэнцкай навукі прайшоў конкурс на лепшую студэнцкую навукова-даследчую лабараторыю. Філалагічны факультэт на ім прадстаўляла СНДЛ “Сучасны літаратурны працэс у рэцэпцыі будучых настаўнікаў”, створаная пры кафедры беларускай літаратуры і культуры.

У 382-й аўдыторыі сабраліся ўдзельнікі 17 лабараторый (а ўсяго ва ўніверсітэце іх 35) з розных факультэтаў БДПУ. Выступленні канкурсантаў ацэньвала журы ў складзе вопытных і маладых навукоўцаў, якое ўзначальваў загадчык навукова-даследчага сектара БДПУ Павел Аркадзьевіч Мацюш.

Маладыя даследчыкі падзяліліся навуковымі адкрыццямі і дасягненнямі, прэзентавалі ўласныя праекты. Годна выступілі і літаратуразнаўцы ў складзе старшыні лабараторыі Марыі Рак (31 група) і сакратара Ганны Курман (52 група), якіх падтрымлівалі Аляксандра Краўцова і Кацярына Лапунова (21 група) разам з кіраўніком СНДЛ дацэнтам Наталляй Віктараўнай Заяц.

Прысутным быў прадэманстраваны фільм-візітка, зняты пры дапамозе сяброў і партнёраў лабараторыі спецыялізаванага адукацыйнага сайта “Адукар”.

Акрамя таго, студэнты філалагічнага факультэта Юлія Рогава, Аляксандр Снітко, Алена Чэпік, Алена Акапджанава выступілі ў складзе каманд  гісторыкаў і псіхолагаў.