На працягу дзесяці дзён ва ўніверсітэце праводзілася шмат мерапрыемстваў, дзе студэнты змаглі прадэманстраваць свае крэатыўныя і даследчыцкія здольнасці, а кампетэнтнае журы ацаніць іх навуковыя дасягненні. У конкурсах удзельнічалі і выкладчыкі: вызначаўся лепшы кіраўнік навукова-даследчай работы студэнтаў.

Прадстаўнікі філалагічнага факультэта прынялі актыўны ўдзел у навуковым марафоне і не засталіся незаўважанымі. 29 красавіка ў актавай зале БДПУ прайшло ўрачыстае закрыццё Дэкады студэнцкай навукі, на якім выступіў рэктар БДПУ прафесар А.І. Жук. У прысутнасці прадстаўнікоў нашага ўніверсітэта і іншых ВНУ краіны, вучняў педагагічных класаў філфакаўцы былі названы пераможцамі ў некалькіх намінацыях.

Студэнтка 13-й групы Юлія Рогава як каардынатар каманды праекта “UniverCity” атрымала дыплом за “Лепшы стартап сацыяльнай скіраванасці”. Студэнтка 11-й групы Алена Фендзіч узнагароджана дыпломам 1 ступені за лепшы даклад на секцыі “Сучасныя праблемы філалагічнай навукі”, што працавала ў рамках Рэспубліканскай студэнцкай навукова-практычнай канферэнцыі “Студэнцкая навука – інавацыйны патэнцыял будучыні”.

Загадчык кафедры беларускай літаратуры і культуры, дацэнт Ірына Мікалаеўна Гоўзіч уганаравана як пераможца конкурсу “Лепшы кіраўнік НДРС БДПУ”.

Шчыра віншуем філфакаўцаў і жадаем поспехаў надалей!