28 красавіка 2021 года ўдзельнікі СНДЛ “Літаратура – погляд маладых” з груп 310118 і 310218 прадставілі свае даклады аднакурснікам.

Ганна Лукашэвіч пазнаёміла з навуковым паведамленнем “Гістарычны раман У. Ліпскага «Цар»: ідэйны змест”. Ганна Грыга агучыла даклад “Драма рэпрэсіраванага творцы (паводле верша Язэпа Пушчы “Выстрыгалі з фотакартак…”)”. Караліна Валеўская падзялілася разважаннямі па праблеме “Мастацкае ўвасабленне тэмы дзяцінства ў прозе пачатку ХХ стагоддзя (на матэрыяле апавяданняў Цёткі, Якуба Коласа і Змітрака Бядулі)”. Дзяўчаты адказвалі на пытанні, удакладнялі акалічнасці працы над матэрыяламі. Акрамя таго, завочна было прадстаўлена міні-даследаванне Таццяны Гапановіч “Паэтычны гербарый Л. Дранько-Майсюка (на матэрыяле нізкі “Вершы для А”)”.

Даклады трэцякурсніц, напісаныя пад кіраўніцтвам дацэнта Наталлі Віктараўны Заяц, разам з матэрыяламі іншых сяброў лабараторыі былі ўключаны ў праграму Навукова-практычнай канферэнцыі з міжнародным удзелам “Актуальныя пытанні філалагічнай адукацыі ў ХХI стагоддзі”, праведзенай 20 красавіка 2021 года на факультэце.

Варта падкрэсліць, што асновай выступленняў Ганны Грыга і Караліны Валеўскай сталі назіранні, зробленыя падчас працы на практычных занятках па “Гісторыі беларускай літаратуры”. Роздумы студэнтак над мастацкімі творамі “выраслі” ў арыгінальныя літаратуразнаўчыя тэксты, якія ў хуткім часе будуць апублікаваны ў зборніку матэрыялаў канферэнцыі “Актуальныя пытанні філалагічнай адукацыі ў ХХI стагоддзі”.