Нацыянальная бібліятэка Беларусі славіцца не толькі ў нашай краіне, але і далёка за яе межамі. Таму выбар менавіта гэтага месца для экскурсіі студэнтаў 12 групы факультэта беларускай і рускай філалогіі разам з куратарам дацэнтам кафедры беларускага мовазнаўства Таццянай Яўгенаўнай Старасценкай быў невыпадковы. 19 лістапада 2014 г. студэнты пазнаёміліся з разнастайнымі заламі першага, другога і трэцяга паверхаў бібліятэкі, навучыліся заказваць літаратуру, убачылі выставы густоўнай графікі і вытанчаных скульптур. Асабліва ўразіла зала рэдкай кнігі, дзе захоўваюцца старажытныя рукапісы, інкунабулы, выданні Скарыны “Іоў” (Прага, 1517 г.), “Царствы” (Прага, 1518 г.) і інш. На фотастэндах адлюстраваны асноўныя перыяды дзейнасці Нацыянальнай бібліятэкі, а стол бібліятэкара вяртае ў далёкія 20-я гады ХХ стагоддзя.

У канцы экскурсіі студэнты прызналіся, што ў найбліжэйшы час абавязкова запішуцца сюды, каб узбагаціцца новымі ведамі, знаёмствамі і ўпэўнена адчуваць сябе ў сучасным навуковым свеце.