26 красавіка студэнты 12 групы філалагічнага факультэта разам са сваім куратарам, дацэнтам кафедры мовазнаўства і лінгвадыдактыкі М.В.Шабовічам наведалі аўтарскую вечарыну паэтэсы, перакладчыцы, лаўрэата прэміі “За духоўнае адраджэнне” Валянціны Паліканінай  “Мелодия любви с названием Апрель”.

Імпрэза праходзіла ў бібліятэцы №1 г. Мінска і сабрала нямала прыхільнікаў прыгожага мастацкага слова. Валянціна Пятроўна пазнаёміла прысутных са сваімі кнігамі, прачытала шэраг вершаў на вечную тэматыку. Блізкая сяброўка паэтэсы, заслужаная артыстка Беларусі Ірына Нарбекава па-майстэрску прадэкламавала любімыя творы В.Паліканінай. Паэты Мікола Шабовіч і Дзмітрый Пятровіч прачыталі па некалькі сваіх перакладаў вершаў В.Паліканінай на беларускую мову, а апошні да таго ж выканаў і дзве песні, якія сталі прыемным сюрпрызам для паэтэсы. Некалькі песень на вершы віноўніцы ўрачыстасці пранікнёна праспяваў бард Андрэй Зыгмантовіч. Свае музычныя падарункі падрыхтавалі і юныя навучэнцы музычнай школы №1. Сустрэча нікога не пакінула раўнадушным, яшчэ раз паказала, што і ў наш час камп’ютарных тэхналогій нельга абысціся без паэзіі, якая робіць жыццё насычаным і духоўна напоўненым.