Вось і закончылася XXV Мінская міжнародная кніжная выстаўка-кірмаш, у межах якой адбыліся шматлікія прэзентацыі кніг, сустрэчы з айчыннымі і замежнымі літаратарамі. Ганаровым госцем на гэты раз была Сербія, а паказаць  свае дасягненні змаглі творцы 32 краін. На працягу пяці дзён выстаўку наведалі каля 30 тысяч мінчан і гасцей сталіцы.

Актыўны ўдзел у мерапрыемствах міжнароднай выставы прыняў і дацэнт кафедры беларускага мовазнаўства, паэт, член Саюза пісьменнікаў Беларусі Мікола Шабовіч. Так, 1 сакавіка ён выступіў з вершамі пра сваю малую радзіму – вёску Бадзені на Мядзельшчыне – на імпрэзе Мінскага гарадскога аддзялення Саюза пісьменнікаў Беларусі “Усё пачынаецца з Радзімы”, а 2 сакавіка прэзентаваў сваю новую кнігу вершаў “Маладыя мроі маладога лета”.