27 лістапада 2020 года на філалагічным факультэце адбылася ХІІ Міжнародная навуковая канферэнцыя “Танкаўскія чытанні”, прымеркаваная не толькі да чарговага дня нараджэння класіка беларускай літаратуры, імя якога носіць наш універсітэт, але і да Года малой радзімы, і дня заснавання БДПУ. 

Адметнасцю канферэнцыі стаў фармат яе правядзення: вочны, завочны і анлайн. З прывітальным словам на ўрачыстым адкрыцці канферэнцыі да ўдзельнікаў звярнулася намеснік дэкана філалагічнага факультэта па навуковай рабоце Алёна Ігараўна Жышкевіч.

Пленарнае пасяджэнне адбылося ў традыцыйнай форме. На ім былі прадстаўлены ўсе аспекты, звязаныя з жыццём і творчасцю Максіма Танка. Анастасія Канстанцінаўна Козік (загадчык музея БДПУ) і Мікіта Святаслававіч Рачылоўскі (студэнт 3 курса гістарычнага факультэта БДПУ) расказалі прысутным праўшанаванне памяці пра Максіма Танка ў БДПУ. Дацэнты філалагічнага факультэта Наталля Віктараўна Заяц і Аляксандр Іванавіч Лугоўскі ў сваіх дакладах звярнулі ўвагу на спецыфіку вывучэння творчасці Максіма Танка ва ўстановах агульнай сярэдняй і вышэйшай адукацыі. Загадчык кафедры замежных моў Вольга Юр’еўна Шыманская прадставіла ўвазе слухачоў паведамленне пра рэцэпцыю твораў Максіма Танка і яго ролю ў айчынным і сусветным літаратурным працэсе.

5 секцый, на якіх было заяўлена больш за 100 удзельнікаў з Беларусі, Расіі, Кітая, Украіны, Ірака, працавалі ў анлайн- і завочным фарматах. Падчас пасяджэнняў было дэталёва абмеркавана шырокае праблемнае поле: творчасць Максіма Танка і нацыянальны, еўрапейскі і сусветны кантэкст; беларуская і сусветнаялітаратура на мяжы тысячагоддзяў: традыцыі і перспектывы; літаратура ў сучаснай мультыкультурнайі інфармацыйнай прасторы; нацыянальныя мовы ў гістарычна-культурным працэсе; культуралагічны, літаратуразнаўчы і лінгвістычны кампаненты сучаснай адукацыйнай прасторы.

Традыцыйна ў межах канферэнцыі выступілі маладыя даследчыкі з розных гарадоў Беларусі, большасць з якіх прадстаўляла БДПУ.